GURIT WAJIB SMA/SMK/MA
ELINGA
Nursisto
Wus kababar unining sejarah
Lamun perjuwangan iku ambuka lawang
Kanggo lumaksane sadaya pangarah
Kang sakawit lagi gawang-gawang
Ing wusana dadi kanyatan lan mbregagah
Aja lali lan keli uleging jaman
Kang kaya-kaya dadi
kraman ing nagari
Ngentirake sakabehing kaprayitnan
Kang dinarbe wiwit duk
nguni
Bangsa Indonesia sugih kautaman
Elinga bangsa wetanan kang sugih
tatanan
Patrap alus mbudi daya jroning ngaurip
Nora gemerlapan kaya lampu ing ndalan
Nuhoni jejibahan kang tinitip
Dening panguwasa kang ngemudhi peprentahan
Nuhoni lan uga ngrasa
wani
Manggul dhuwur lan
mendhem jero
Anggennya dadi kawula nagri
Kang awateg luhur ing
njaba njero
Minangka lumintuning
kaurmatan sasami
Ayo den eling sakehing pemut
Kang nggegadhang tumekane mangsa
Urip kaya laku jantraning semut
Kebak guyup rukun ing sasama
Karana ing sadaya kepanggih runtut
GURIT PILIHAN SMA/SMK/MA
LENA
Suwasti Ratri Eni Lestari
Jare...
Lemah wutah getih iki,
Suwarga...
Theklek, kayu, lan watu
Bisa dadi tetuwuhan
Tirta tumrap amerta
Samirana sumilir ing
pinggir
Sesawangan maneka rupa
ngegla rumesep ati
Gawe adheming piker, gawe
tentreming nala
Jare...
Dewi Sri tansah ngayomi
Sandhang, pangan, papan,
Saben jalma keduman
Ah... lingsiring jaman saya edan
Mangsa rendheng lan ketiga mblandhang gedabigan
Lemah bengkah, wit-witan
semplah
Bengawan luber mbleber tekan ngemper
Puwuhan ngebaki plataran
Papan gegojegan ora
kumanan kalodhangan
Ah... sapa sing arep ndandani?
Yen kabeh janma murang
tata
Tan duwe rasa tanggap
ing sasmita?
Lena!
GURIT PILIHAN SMA/SMK/MA
KALI ILANG KEDHUNGE
Tulus Widodo
Kali
kang banyune bening mung kari crita
Kali
kang akeh iwak iku wis kuna
Kali
kang jero wis ora ana
Saiki
kali wis ora dadi kanca
Kepara
dadi mungsuh kang gawe cilaka
Kali
ilang kedhunge ramalane pujangga
Pancen
nemahi lan nyata
Lamun wanci rendheng udan teka
Banjir
bandhang gawe sengsara
Utawa
banyune buthek kebak lelethek
Ambune
bacin ndulek
Wis
ora ana wong wani ciblon
Kaya
biyen banyune kinclong kaya pengilon
Wolak
waliking jaman pancen kelakon
Biyen
karo saiki banget bedane
Pokale manungsa
kang nggugu karepe dhewe
Mbuwang
uwuh sakepenake
Mbabadi
alas tanpa digagas
Kanggone
sing isih padha waras
Jaganen
alam iki kanthi ikhlas
GURIT PILIHAN SMA/SMK/MA
SING WASPADA
Bambang Nugroho
Panguwasa, rajabrana lan
pepaesing donya
Pancen tansah gawe godha
Kanggo tindak culika
Nalisir saka paugerane agama
Tatakrama apadene suba sita
Yen ora kuwawa
Nampa kanthi legawa
Kaya-kaya kabeh kudu den rengkuh
Lali marang janji setya
Apadene sumpah kang kaucap
Nganti padha antri mlebu kunjara
Sadurune tekan ing neraka
Yen bisa sangune
Mung eling lan waspada,
Nalika panguwasa, rajabrana lan
pepaesing donya
Pancen tansah gawe godha
Kanggo tindak culika
Nalisir saka paugerane agama
Tatakrama apadene suba sita
Yen ora kuwawa
Nampa kanthi legawa
Kaya-kaya kabeh kudu den rengkuh
Lali marang janji setya
Apadene sumpah kang kaucap
Nganti padha antri mlebu kunjara
Sadurune tekan ing neraka
Yen bisa sangune
Mung eling lan waspada
Tidak ada komentar:
Posting Komentar