CERKAK SMP/MTs
GEGURITAN
Dening : G. M. Sigit Nurcahyanto Adhi
Preinan unggah-unggahan kelas, sekolahku nganakake kemah kanggo ujian pramuka. Satemene ya seneng bisa melu
kemah, nanging aku kabotan menawa urunan dhuwit. Keluargaku kalebu keluarga kang
kecingkrangan, nanging aku kepengin kaya bocah-bocah liya kang bisa sinau lan tambah pinter. Akeh babagan kang
kepengin takmangerteni, kaya babagan taneman, kewan-kewan, planet, laut, lan
liya-liyane.
Wektu kemah wis kawiwitan ing Jemuwah sepisan wulan Juli ing bumi
Perkemahan Babarsari. Papan kasebut cedhak kali lan isih akeh wit-witan gedhe.
Aku mangkat diterke ibuku nganggo pit
onthel, amarga omahku ora adoh
seka papan kemah kasebut. Ing kono wis katon para guru, kanca-kanca, pengurus osis, lan wali murid kang
ngeterke anak-anake. Aku gage pamitan marang ibu sinambi ngambung astane ibu
banjur nglumpuk karo kanca-kancaku. Ing
kelompokku, kelompok singa, aku dipilih dadi ketua. satemene aku dipilih ora
merga aku paling pinter, ananging merga aku ora kuwat bayar urunan kanggo kelompokku.
Dadi satemene, tanggung jawabku luwih gedhe tinimbang kanca-kancaku lan aku
bisa dikongkon-kongkon.
Acara sepisanan yaiku ngedekake tendha ing lapangan. Aku sakanca seneng ngleksanakake
acara iki merga bisa ngraketke gotong-royong. Banjur, aku sakanca melu lomba
kayata, pioneering,
nglukis woh-wohan, lan kerapian tendha. Puncak kegiatan ing dina sepisanan, yakuwi jurit
malam. Apese, bengi iki bengi kang miturut kapercayane wong Jawa dadi dina kang
angker. Ya, bengi iki malem Jemuwah kliwon. Sumilire angin lan
godhong kang gogrog tumiyup angin seka wit-wit. Kang rungkut sing tak liwati
gawe aku lan reguku keweden. Ditambah meneh kahanane
peteng. Aku saregu mung entuk migunakake senter siji. Saiki reguku keri rada
adoh ditinggal regu-regu liyane amarga reguku
rada kethetheran saben-saben mandheg pos-pos sing diliwati. Sawise ngliwati pos
3, aku sakanca saya ngrasakake babagan-babagan kang aneh lan marakke mrinding,
nanging wusana aku sakanca bisa ngrampungke jurit malam kanthi lancar.
Dina candhake aku sakanca melu lomba, jelajah alam lan masak. Kegiyatan rampung jam
13.00, banjur padha mangan
bareng. Sawise istirahat kegiyatan diteruske lomba geguritan lan halang rintang. Ing reguku aku dipilih dadi wakil regu melu lomba
geguritan. Geguritan kuwi sawijine karya sastra jinis puisi basa Jawa. Sajane wis tak batin menawa
aku bakal dikongkon kanca-kancaku melu geguritan. Ing reguku ora ana sing gelem
melu lomba geguritan amarga kanca-kancaku ngarani menawa geguritan kuwi wis ketinggalan jaman. Kanca-kancaku padha isin menawa nyinau
geguritan. Senajan kaya ngono aku nrima tugas iki kanthi semangat. lomba
geguritan dileksanakake ing pendhapa.
Nalika weruh pasarta liyane aku
rada grogi. Aku ngerti para pasarta kuwi wis kerep melu lomba basa lan
sastra Jawa. Kepara, salah sawijining pasarta wis tau dadi juara sesorah
sakutha yogyakarta. Juri lomba ana telu saka priyayi kang mimpin majalah-majalah basa Jawa kang wis kawentar. Aku rada mangu-mangu, nanging Gusti kaya
paring semangat kang gedhe supaya aku ora nglokro ngadhepi lomba iki. Pasarta diwenehi wektu 10
menit kanggo nulis geguritan banjur macakake sangarepe juri. Aku rada
kamitenggengen nalika ndeleng pasarta kang maju macakake geguritan, mligine
sing jenenge Anik, juwara II lomba geguritan sa-DIY. Kringetku saya akeh dleweran. Para
pasarta macakake geguritane ngenani kaendahaning donya, jasa-jasa guru lan wong tuwa,
paseduluran, nasionalisme lan
liya- liyane. Kabeh katon percaya dhiri manggung sangarepe penonton. Ananging
aku tetep nyoba nguwati atiku dhewe. Aku gawe geguritan nganggo idhe seka
kegiyatan kemah iki. Kabeh pasarta wis maju. kari aku dhewe lan wakil seka regu
lawa.
“Pasarta sabanjure, perwakilan seka regu
singa. kasuwun maju!” keprungu swara saka pengeras swara.
Atiku rasane kaya meh copot krungu
swara mau. Wis saiki ora ana pilihan meneh aku kudu ngadhepi kasunyatan, maju
macakke geguritanku kanthi judhul “Swara Nyalawadi”
Swara Nyalawadi
Bengi iki aku turu ing tendha
Bengi iki acara kemah Pramuka
Aku turu angler merga kekeselen
Sajroning turu...
Kaya impen, keprungu swara nyenthit sing ngagetake aku
Mripatku tak lekke senajan abot
Tak goleki mrana-mrene nanging ora ketemu asale
swara kuwi
Wah... puyeng sirahku
Swara
jangkrik dudu,
Swara
kucing dudu,
Apa
meneh swara orong-orong
Wis embuh lah
Tak bacutke
olehku merem
Durung angler anggonku ngeremke mripat
Eh, lhadhalah kok ya muni meneh swara mau
Saiki
katone ora baen-baen....
Wah ketoke
kewane wis saya cedhak
Ketambahan
ganda aneh sisan
Aku
saya siyaga
Tak ambu-ambu...
Kaya-kaya aku ora pangling karo ambune
Wah aku kudu siap-siap
Kewan iki mambu kaya Sigung
Mripat
mlolo nujuganda aneh mau...
Mak
gragap...
Saiki
swara kuwi nyenthit tambah banter ing sebelahku
Ketambahan
ganda kang saya gambret
Aku
jenggirat...
Basan tak tamatke
Basan tak senteri
Jebul swara kuwi
Asale seka njero sarunge si Kamto kang lagi jingkrung
Oalaaaahhhhh ...
Tooo,
Kamtoooo...
Sore
mau kowe sambat lara weteng
Jiaaaaan blaikkkkk...
Tanpa taknyana sawise maca
geguritan mau kabeh padha ngguyu, para guru lan para juri. Sawise giliranku, banjur
walik seka regu lawa minangka pasarta pungkasan. Sawise kuwi aku kari nunggu
juri mbiji pasarta lan ngumumake pemenang ing dina pungkasan kemah. Dina pungkasane kemah aku sakanca wiwit ngukuti barang-barang. Aku wis bisa mbedhek menawa bakal dikongkon kanca-kancaku
ngasahi piring. Alesane
merga aku ketua kelompok. Ya wis, tak tampa kanthi seneng wae. Pungkasan acara
kemah ana upacara penutupan lan pengumuman pemenang lomba. Wektu kuwi sing ndadekake jantungku dheg-dhegan kenceng. Embuh kena ngapa, grogi, wedi,
utawa apa aku ora ngerti nalika nunggu pengumuman lomba geguritan. Ananging aku
wiwit pasrah amarga aku krasa nek bakal kalah ing lomba geguritan. Pengumuman
lomba-lomba wiwit diwara-warakke lumantar pengeras suara. “Dan, pemenang lomba
geguritan adalah Budiiiii dari regu Singa,” mangkono pengumuman kang diwacakke
dening salah sawijning Juri kang rawuh ing penutupan acara kemah.
Wah rasane kaya ngimpi mangerteni menawa aku dadi juwara 1 seka 12 pasarta
ing lomba geguritan. Ora dinyana geguritanku dibiji apik lan bisa ngalahake
geguritane anik, juwara nulis geguritan DIY. Sanalika kringetku kang anyep dadi
kringet kabungahan. Banjur juri kasebut ndhawuhi aku maju ing panggung lan
nampa bebungah. Keprungu swara keplok rame banget seka para guru
lan siswa-siswa pramuka. Ora
taknyana mripate kanca-kancaku seka regu singa mandeng aku kanthi gumun, ora
nyana menawa aku menang. Wusana kemenanganku iki ndadekake regu singa dadi
juwara umum lomba ing kemah wektu iki.
“Nak, kowe duwe bakat nulis geguritan. bakatmu iki bisa dadi modhal
kanggomu supaya bisa terus makarya kanthi professional,” ature juri kuwi karo mbisiki aku lan nyalami tanganku kenceng.
Ora krasa luhku ndlewer. Ujug-ujug tuwuh pikiranku menawa aku bisa golek
dhuwit kanthi nulis geguritan lan kamot ing majalah basa Jawa. aku bisa
mbiyantu ibuku.
Jam ing pendhapa wis nuduhake jam 13.00, pratandha upacara penutupan acara
kemah taun ajaran 2018 wis rampung. Aku gage mlayu menyang tendha
lan mberesi kabeh barangku bareng kanca-kanca. Sawise kuwi aku bali bareng
kanca-kancaku.
Tekan ngomah takcritakake marang ibuku kabeh kedadeyan-kedadeyan mau.
keprungu swara lirih ibuku ngendika, “Matur nuwun Gusti. Panjenengan sampun paring
pepadhang marang Budi.”
